08.05.2026 - NJOFTIM PËR PËRFUNDIMIN E FAZËS SË DYTË TË PROVIMIT TË PRANIMIT SHPALLJA E REZULTATEVE

Shkolla e Magjistraturës shpalli sot më datë 8 maj 2026, rezultatet e vlerësimit të fazës së dytë të provimit të pranimit dhe renditjen e konkurrentëve sipas këtyre rezultateve.

Mbi procesin e vlerësimit

Pas përfundimit të fazës së dytë (dita e dytë) më 24 prill 2026, Këshilli Drejtues i Shkollës së Magjistraturës caktoi komisionin e vlerësimit të provimit për këtë fazë. Komisioni përbëhej nga 7 (shtatë) anëtarë, 3 (tre) anëtarë pedagogë të brendshëm në Shkollën e Magjistraturës: z. Vangjel Kosta, z. Artan Hajdari, z. Idlir Peçi dhe 4 (katër) anëtarë, pedagogë të jashtëm në Shkollën e Magjistraturës, znj. Arta Mandro, znj. Elvana Çiçolli, z. Dashamir Kore, z. Klodian Kurushi.

Komisioni i vlerësimit u mblodh në Shkollë më datë 25 prill 2026 për të hartuar çelësin e përgjigjeve për çdo fushë dhe rast praktik mbi të cilin do të vlerësoheshin kandidatët në dy ditët e provimit. Çelësi i tezave u shpall menjëherë publikisht në mjediset e Shkollës së Magjistraturës dhe në faqen zyrtare.

Procesi i korrigjimit të provimit u zhvillua i pandërprerë prej datës 25 prill 2026 deri në datën 7 maj 2026, në mjediset e Shkollës së Magjistraturës, sipas parashikimeve të Rregullores së Brendshme të Shkollës lidhur me rregullat e procesit të korrigjimit.

Shpallja e rezultateve

Shkolla e Magjistraturës, në datën 7 maj 2025, njoftoi publikisht për zhvillimin e procesit të identifikimit më 8 maj 2026, ora 11.00.  Më 7 maj në mjediset e Shkollës dhe në faqen zyrtare dolën paraprakisht rezultatet e provimit të fazës së dytë, sipas numrave të sekretimit për të dyja ditët. 

Procesi i identifikimit filloi në orën 11:00 minuta. Në shpalljen e rezultateve ishin të pranishëm pjesa më e madhe e konkurrentëve. Ky proces u ndoq në kohë reale nga të interesuarit, në adresën e njoftuar nga Shkolla, në mënyrë që kushdo të njihej me procedurën dhe rezultatet e vlerësimit. Në përfundim të këtij procesi, Shkolla publikoi listën përfundimtare ku u renditën konkurrentët sipas pikëve të marra prej tyre në fazën e dytë të provimit të pranimit.

Afati i ankimit

Konkurrentët kanë të drejtë të ushtrojnë të drejtën e ankimit brenda 3 (tre) ditëve nga shpallja e rezultateve.

Mbi rezultatet e vlerësimit

Nga 171 (njëqind e shtatëdhjetë e një) konkurrentë që morën pjesë në fazën e dytë të provimit të pranimit, 50 (pesëdhjetë) prej tyre arritën të vlerësohen me më shumë se 60% (gjashtëdhjetë për qind) të pikëve maksimale të mundshme për të dy ditët (katërqind pikë). Pra, 29% (njëzet e nëntë për qind) e konkurrentëve arritën të kalonin pragun minimal të vendosur nga Rregullorja. 

Testimi i tretë- testi i shëndetit mendor dhe psikologjik

Testi i shëndetit mendor dhe psikologjik do të zhvillohet sipas rregullave të përcaktuara në Rregulloren e Brendshme të Shkollës së Magjistraturës. 

Renditja e emrave