Njoftohen të gjithë të interesuarit, që dëshirojnë të konkurrojnë në Shkollën e Magjistraturës, se:
Në zbatim të ligjit nr. 115/2016, “Për organet e qeverisjes së sistemit të drejtësisë”, ligjit nr. 96/2016, “Për statusin e gjyqtarëve dhe të prokurorëve në Republikën e Shqipërisë”, Rregullores së Brendshme të Shkollës së Magjistraturës, fillojnë regjistrimet për provimin e pranimit për kandidatë për magjistratë për vitin akademik 2023-2024.
Numri i vendeve vakante për pranimin në Programin e Formimit Fillestar për vitin akademik 2023-2024, do të jetë 80 kandidatë për magjistratë, nga të cilët 40 profili gjyqtarë dhe 40 profili prokurorë.
Regjistrimi i kandidatëve për magjistratë do të bëhet në sekretarinë shkencore të Programit të Formimit Fillestar pranë Shkollës së Magjistraturës në periudhën 1 shkurt - 28 shkurt 2023, nga ora 9.00 – 14.00 (Godina e re, “Poli i Drejtësisë”, rruga “Ana Komnena”, Tiranë).
Do t’ju luteshim të mbani në vëmendjen tuaj, shfrytëzimin e ditëve të para të regjistrimit për të mos shkaktuar mbingarkesë ditët e fundit të shkurtit dhe përfundimit të regjistrimeve.
Kandidati për magjistrat që do të regjistrohet për të marrë pjesë në provimin e pranimit në Shkollën e Magjistraturës duhet të plotësojë këto kushte:
- të ketë zotësi të plotë për të vepruar;
- të jetë shtetas shqiptar;
- të ketë përfunduar ciklin e dytë të studimeve universitare për drejtësi, me diplomë “Master i shkencave”, ose të barasvlershëm me të, sipas përcaktimeve të legjislacionit të arsimit të lartë, referuar nenit 124 të ligjit nr. 80/2015, “Për arsimin e lartë”. Diplomimi duhet të mbështetet në përfundimin e një programi sipas sistemit të Bolonjës 5-vjeçar, ose të jetë diplomuar si “Jurist” me një diplomë universitare të fituar para përshtatjes së studimeve sipas sistemit të Bolonjës në një program 4-vjeçar, e cila është ekuivalente me një Diplomë të Integruar të Nivelit të Dytë, (DIND)”;
- të ketë notë mesatare të përgjithshme mbi 8 (tetë), si dhe notë mesatare mbi 8 (tetë) për grupin e lëndëve kryesore, ku përfshihen: e drejta civile dhe e detyrimeve dhe kurset e saj të thelluara dhe të posaçme; e drejta penale (pjesa e përgjithshme dhe pjesa e posaçme) dhe kurset e saj të thelluara dhe të posaçme; procedura civile dhe kurset e saj të thelluara dhe të posaçme; procedura penale dhe kurset e saj të thelluara dhe të posaçme; e drejta administrative dhe kurset e saj të thelluara dhe të posaçme; e drejta kushtetuese dhe kurset e saj të thelluara të posaçme. Përcaktimi i kurseve të thelluara dhe të posaçme parashikohet në VKM-në nr. 41/2018, “Për elementet e programeve të studimit ofruar nga institucionet e arsimit të lartë”. Për të diplomuarit “Juristë”, në programe në gjuhë të huaj jashtë vendit, parashikohet një koeficient vështirësie i barabartë me 1.2, i cili do të ponterojë mesataren e tyre faktike;
d/1) Nota mesatare e përgjithshme del nga shumatorja e notave të të gjitha lëndëve të zhvilluara në ciklin e parë dhe të dytë të studimeve e pjesëtuar me numrin total të tyre. Për grupin e lëndëve kryesore mesatarja del nga shumatorja e grupit të lëndëve kryesore e pjesëtuar me numrin total të tyre.
- të ketë të paktën tre vjet përvojë profesionale aktive me kohë të plotë si jurist, pas diplomimit në ciklin e plotë të studimeve universitare, në sistemin gjyqësor ose të prokurorisë, në administratën publike, profesionet e lira ligjore, mësimdhënie në fakultetet e drejtësisë, ose në çdo pozicion tjetër të barasvlershëm me to, në sektorin privat ose organizatat ndërkombëtare;
- të mos jetë dënuar me vendim penal të formës së prerë për kryerjen e një vepre penale, që për shkak të natyrës së veprës së kryer, diskrediton pozitën dhe figurën e gjyqtarit ose prokurorit dhe dëmton rëndë besimin e publikut në sistemin gjyqësor, pavarësisht nëse është rehabilituar sipas parashikimeve të Kodit Penal;
- të mos jetë larguar nga detyra ose të mos i jetë hequr licenca, autorizimi ose leja për ushtrimin e një profesioni për shkaqe disiplinore, pavarësisht nëse masa disiplinore konsiderohet e shuar, si dhe të mos ketë masë disiplinore në fuqi.
- të mos jetë anëtar i partive politike në kohën e kandidimit;
- të mos ketë qenë anëtar, bashkëpunëtor ose i favorizuar nga Sigurimi i Shtetit përpara vitit 1990;
- të mos ketë qenë bashkëpunëtor, informator ose agjent i shërbimeve sekrete.
Kandidati, për regjistrim, duhet të paraqesë dokumentet e mëposhtme, ose kopje të tyre të noterizuara:
- Në dosjen personale për regjistrim, studenti duhet të paraqesë dokumentet e mëposhtme, ose kopje të noterizuara të tyre:
- kërkesën personale, ku të parashtrojë shkaqet e motivimit për të ndjekur Programin e Formimit Fillestar, kërkesën për profilin e zgjedhur si gjyqtar, prokuror. Kërkesa plotësohet në formularin unik që shpërndahet nga Shkolla e Magjistraturës (Aneksi 1) Në rast se aplikanti ka zgjedhur më shumë se një profil si magjistrat, atëherë dosja me dokumentacionin e aplikimit do të përcillet në Këshillin e Lartë Gjyqësor dhe në Këshillin e Lartë të Prokurorisë;
- deklaratën ku të garantojë vërtetësinë e dokumentacionit që paraqet, e përmbushur sipas një formulari të parashikuar në Aneksin 1 të kësaj Rregulloreje;
- diplomat universitare dhe pasuniversitare për studimet që ka ndjekur;
- dëshmi/certifikata të mbrojtjes së një prej pesë gjuhëve zyrtare të Bashkimit Europian: anglisht, frëngjisht, italisht, gjermanisht dhe spanjisht, mbi bazën e testeve ndërkombëtare, të njohura nga Ministria e Arsimit, Sportit dhe Rinisë. Nëse individi ka fituar një diplomë universitare të një programi studimi për drejtësi, të kryer në një nga vendet e Bashkimit Europian dhe në programin mësimor të studimeve është vlerësuar edhe për njërën prej këtyre pesë gjuhëve të huaja, diploma e fituar shërben si dëshmi për plotësimin e këtij kriteri;
- jetëshkrimin;
- kartën e identitetit;
- vërtetimin e gjendjes gjyqësore;
h) raportin mjeko-ligjor për aftësimin e tij të përgjithshëm dhe të specializuar në kuadër të kryerjes së detyrës si magjistrat apo profesionist në sistemin e drejtësisë;
i) dëshmi, vërtetime dhe rekomandime nga persona dhe institucione ku ka punuar tri vitet e fundit;
j) vërtetimin nga punëdhënësi i fundit dhe/ose organet disiplinore që nuk është larguar nga detyra ose i është hequr licenca, autorizimi ose leja për ushtrimin e një profesioni për shkaqe disiplinore;
k) deklaratën që vërteton se nuk është anëtar i partive politike në kohën e kandidimit;
l) deklaratën që nuk ka qenë anëtar, bashkëpunëtor ose i favorizuar nga Sigurimi i Shtetit përpara vitit 1990; si dhe nuk ka qenë bashkëpunëtor, informator, ose agjent i shërbimeve sekrete;
m) librezën e punës që të vërtetojë periudhën e vjetërsisë në punë, vërtetime të lëshuara nga organet e sigurimeve shoqërore që tregojnë kontributet e derdhura për shkak të punësimit në vite ose, kur është rasti detyrimet tatimore të derdhura në vite për shkak të zhvillimit të profesioneve të lira juridike.
2. Një fotografi;
3. Mandatin e pagesës për tarifën e regjistrimit në vlerën 12.000 lekë.
Ju bëjmë me dije se pagesa e regjistrimit është e pakthyeshme, në rast se nuk regjistroheni për arsye të mosplotësimit të kushteve të mësipërme.
Konkurrenti, i cili do të aplikojë për kandidat për magjistrat në të dyja profilet, gjyqtar dhe prokuror, duhet të paraqesë dokumentet e mësipërme në
- 1 (një) kopje të noterizuar (gjyqtar & prokuror) dhe 2 (dy) fotokopje.
Brenda datës 15 mars, Shkolla e Magjistraturës, nëpërmjet një komisioni të ngritur për verifikimin e dokumentacionit të mësipërm, kryen një vlerësim paraprak, nëse kandidati i përmbush kriteret e kandidimit. Shkolla ka të drejtën e verifikimit kryesisht të vërtetësisë së dokumentacionit që paraqitet nga kandidatët dhe ka të drejtë të kërkojë informacion shtesë.
Dokumentacioni me kërkesat e plotësuara nga ana e kandidatëve do të depozitohen pranë Këshillit të Lartë Gjyqësor për aplikantët që kanë përzgjedhur profilin e gjyqtarit dhe në Këshillin e Lartë të Prokurorisë për aplikantët që kanë përzgjedhur profilin për prokuror.
Provimi i pranimit do të organizohet me shkrim në dy faza.
Konkurrentët, në të gjitha fazat e organizimit të provimit të pranimit, duhet të kenë me vete dokumentin e identifikimit.
Programi i provimit të pranimit (ku do të gjeni edhe listën e lëndëve që do të shërbejnë si bazë për testimin) është i publikuar në faqen e internetit të Shkollës www.magjistratura.edu.al. Programi i provimit i përgjigjet të dyja fazave të provimit: testi i inteligjencës, gjuhë shqipe, psikologji dhe komunikim, legjislacioni i BE-së, marrëdhënie ndërkombëtare, e drejtë e krahasuar (parimet e përgjithshme), histori, etikë profesionale, e drejtë kushtetuese, e drejtë civile dhe e detyrimeve, procedurë civile, e drejtë penale, procedurë penale, e drejtë administrative, e drejtë familjare, e drejtë tregtare, e drejtë e punës.
Për më shumë informacion vizitoni faqen tonë të internetit: www.magjistratura.edu.alose kontaktoni me Shkollën e Magjistraturës në adresën e e-mail-it info@magjistratura.edu.al
Ju urojmë suksese!
TABELAT ME CERTIFIKIMET E GJUHËVE TË HUAJA
Nr. | GJUHA ANGLEZE |
1 | IELTS |
2 | TOEFL Internetbased Test (iBT) |
3 | TOEFL Paperbased Test (ITP) |
4 | TOEIC |
5 | GESE |
6 | APTIS |
7 | Cambridge |
Nr. | GJUHA FRANCEZE |
1 | TFI |
2 | DELF |
3 | TCF |
4 | TEF |
Nr. | GJUHA ITALIANE |
1 | Peruggia |
2 | Sienna |
3 | PLIDA |
Nr. | GJUHA GJERMANE |
1 | Goethe-Institut, Goethe Zentrum |
2 | TestDaF |
3 | OSD |
Nr. | GJUHA SPANJOLLE |
1 | DELE |