Raport për vlerësimin përfundimtar të kandidatëve për magjistratë që kanë aplikuar për pranimin në Formimin Fillestar, për vitin akademik 2019 – 2020

                                                                                                                                  SHKOLLA E MAGJISTRATURËS

Lënda: Raport për vlerësimin përfundimtar të kandidatëve për magjistratë që kanë aplikuar për pranimin në Formimin Fillestar, për vitin akademik 2019 – 2020

Pas shpalljes me vendimin nr. 17, datë 29.1.2019 të Këshillit të Lartë Gjyqësor dhe me vendimin nr. 21, datë 28.1.2019 të Këshillit të Lartë të Prokurorisë të vendeve vakante për kandidatët për magjistratë për vitin akademik 2019 – 2020, më datë 31.1.2019 është mbledhur Këshilli Drejtues i Shkollës së Magjistraturës. Në këtë mbledhje, krahas disa ndryshimeve në Rregulloren e Brendshme të Shkollës së Magjistraturës është vendosur të bëhet publikimi i thirrjes për kandidime për pranimin në Formimin Fillestar.

Këshilli Drejtues vendosi gjithashtu, mbi:

-          periudhën e regjistrimit për kandidatët në Formimin Fillestar;

-          ngritjen e Komisionit Administrator të Provimit në përbërje të të cilit janë:

1. Drejtori i Shkollës së Magjistraturës;

2. Një përfaqësues i Misionit EURALIUS V;

3. Një pedagog i brendshëm i Shkollës së Magjistraturës.

-          ngritjen e Komisionit të Mbikëqyrjes së Vlerësimit Elektronik të fazës së parë të provimit me përbërjen e:

1. Z. Mirjan Mustafaj, anëtar i Këshillit Drejtues;

2. Znj. I.A, specialiste e informatikës, Shkolla e Magjistraturës;

3. Z. Jetnor Tafilaj, specialist i informatikës, Shkolla e Magjistraturës.

Bazuar në nenin 28 të ligjit nr. 96/2016, Shkolla e Magjistraturës publikoi menjëherë thirrjen për kandidime për Formimin Fillestar, nëpërmjet shpalljes së njoftimit në faqen zyrtare të Këshillit të Lartë Gjyqësor, Këshillit të Lartë të Prokurorisë dhe Shkollës së Magjistraturës, si dhe në dy prej gazetave me tirazh më të lartë në vend.

Me anë të këtij njoftimi u informuan të gjithë të interesuarit për fillimin e procedurës së aplikimeve, periudhën gjatë të cilës Shkolla e Magjistraturës pranon dhe mbledh dokumentacionin e personave të interesuar, datat e zhvillimit të provimit të pranimit, kriteret që duhet të plotësohen sipas parashikimit në nenin 28 të ligjit nr. 96/2016 dhe në nenin 10 të Rregullores së Brendshme të Shkollës së Magjistraturës, si dhe dokumentacionin që duhet të dorëzohet nga personat e interesuar.

Gjithashtu, Drejtori i Shkollës ka nxjerrë Urdhrin e Brendshëm nr. 15, datë 31.1.2019, “Për zhvillimin e provimit të pranimit për vitin akademik 2019-2020”, mbi marrjen e masave për përgatitjen dhe zhvillimin e procesit të provimit të pranimit.

Në këtë urdhër u përcaktua:

-          mënyra e zhvillimit të provimit nga Shkolla e Magjistraturës;

-          përbërja e Komisionit Administrator:

1. Z. Sokol Sadushi, Drejtor i Shkollës së Magjistraturës;

2. Z. Gianluigi Pratola, përfaqësues i Misionit EURALIUS V;

3. Z. Henrik Ligori, pedagog i brendshëm i Shkollës së Magjistraturës.

-          ngritja dhe përbërja e Komisionit për verifikimin e dokumentacionit për procesin e regjistrimit:

1. Z. Vangjel Kosta, pedagog i brendshëm i Shkollës së Magjistraturës;

2. Znj. Laura Pupa, Përgjegjëse e Sektorit të Formimit Fillestar, Shkolla e Magjistraturës;

3. Znj. Erjola Mura, sekretare shkencore për Formimin Fillestar;

4. Z. Rinald Pacara, sekretar shkencor për Formimin Fillestar;

5. Znj. I.A, specialiste informatike.

Përgjatë periudhës 1 deri në 28 shkurt 2019, sekretaria shkencore për Formimin Fillestar pranë Shkollës së Magjistraturës ka pranuar aplikimet nga personat e interesuar për të marrë pjesë në provimin e pranimit.

Gjatë periudhës së regjistrimit, personat që shprehën interesin dhe kryen procedurat e regjistrimit për të marrë pjesë në provimin e muajit Prill janë në total 304 (treqind e katër), nga të cilët:

-          50 (pesëdhjetë) aplikues për kandidatë për këshilltarë dhe ndihmës ligjorë;

-          75 (shtatëdhjetë e pesë) aplikues për kandidatë për këshilltarë për ndihmës ligjorë dhe kandidatë për magjistratë të profilit gjyqtarë e prokurorë;

-          179 (njëqind e shtatëdhjetë e nëntë) aplikues vetëm për kandidatë për magjistratë (për gjyqtarë dhe prokurorë).

Pas përfundimit të periudhës së regjistrimit, 125 aplikantë për kandidatë për këshilltarë e ndihmës ligjorë (50 prej të cilëve kanë aplikuar vetëm për këshilltare dhe ndihmës ligjorë dhe 75 kanë aplikuar për këshilltarë dhe ndihmës ligjorë, si edhe për kandidatë për magjistratë) u dërguan për verifikimin e kritereve ligjore në Këshillin e Lartë Gjyqësor, ndërsa për konkurrentët që kanë aplikuar për kandidatë për magjistratë, Komisioni për verifikimin e dokumentacionit filloi punën për të vlerësuar përmbushjen e kritereve ligjore, mbi bazën e dokumentacionit përkatës.

Më 15 mars 2019, mbi bazën e verifikimeve të kryera, Komisioni ka evidentuar gjetjet për çdo aplikim të paraqitur dhe ka arritur në përfundimin se:

-          225 (dyqind e njëzet e pesë) prej aplikantëve të interesuar përmbushin kriteret ligjore për kandidatë për magjistratë;

-          29 (njëzet e nëntë) prej aplikantëve të interesuar nuk përmbushin kriteret ligjore për kandidatë për magjistratë, që lidhen kryesisht me mosplotësimin e kriterit të pikëve minimale, ose të përvojës profesionale prej tre vjetësh, pas marrjes së diplomës “Master i Shkencave”.   

Më datë 18 mars 2019, Shkolla e Magjistraturës ka përcjellë pranë Këshillit të Lartë Gjyqësor dosjet për 223 (dyqind e njëzetë e tre) aplikantë të profilit gjyqtarë dhe Këshillit të Lartë të Prokurorisë dosjet për 195 (njëqind e nëntëdhejtë e pesë) aplikantë të profilit prokurorë, së bashku me raportin për rezultatet e vlerësimit paraprak të tyre, si dhe listën dhe dosjet e aplikuesve, të cilët nuk kanë përmbushur kriteret ligjore.

Në referim të nenit 30 të ligjit nr. 96/2016, Këshillat kanë dhënë komentet dhe sugjerimet e tyre mbi listën e kandidatëve, duke ja përcjellë ato Shkollës së Magjistraturës.

Bazuar në pikën 4 të nenit 30 të ligjit nr. 96/2016, “Për statusin e gjyqtarëve dhe prokurorëve në Republikën e Shqipërisë”, Shkolla e Magjistraturës shpall sot më datë 1 prill 2019, raportin e vlerësimit përfundimtar, duke marrë në konsideratë komentet dhe sugjerimet e bëra nga Këshillat.

Ky raport publikohet në faqen e saj zyrtare së bashku me listën e kandidatëve, të cilët plotësojnë kriteret e parashikuara në nenin 28 të këtij ligji dhe në pikën 4 të nenit 10 të Rregullores së Brendshme të Shkollës së Magjistraturës.

Lista e kandidatëve të cilët plotësojnë kriteret ligjore, të parashikuara në nenin 28 të ligjit 96/2016 “Për statusin e gjyqtarëve dhe prokurorëve në Republikën e Shqipërisë“, si edhe në pikën 4 të nenit 10 të Rregullores së Brendshme të Shkollës së Magjistraturës dhe që do të marrin pjesë në provimin e pranimit është si më poshtë vijon:

LISTA E KONKURRENTËVE TË CILËT JANË KUALIFIKUAR PËR TË MARRË PJESË NË PROVIMIN E PRANIMIT PËR PROGRAMIN E FORMIMIT FILLESTAR PRANË SHKOLLËS SË MAGJISTRATURËS PËR VITIN AKADEMIK 2019 – 2020